पवन शाह शुक्रबार, साउन २३, २०८२
बिराटनगर / मोरङको विराटनगर महानगरपालिका–१४ स्थित विराटनगर–एकीकृत जाँच चौकी (ICP) भित्री सडक खण्डमा एक लहरी दुर्घटना भएको छ।
इलाका प्रहरी कार्यालय (इप्रका) रानीका अनुसार मिति २०८२ साउन २३ गते राति करिब १०:३० बजे प्लाई लोड गरी नेपालबाट भारततर्फ गइरहेको आरजे–१९ जीएफ ५८२८ नम्बरको लहरी अनियन्त्रित भई सडकको बायाँपट्टि पल्टिएको हो।
दुर्घटनाको जानकारी पाएलगत्तै प्र.नि. कबिन राईको कमाण्डमा ११ जनाको प्रहरी टोली खटिएको थियो। लहरीमा भारतको जोधपुर, आगोलाई निवासी ४१ वर्षीय चालक हरिराम जाट मात्रै सवार थिए। उनलाई सकुशल उद्धार गरिएको प्रहरीले जनाएको छ।
दुर्घटनामा अन्य मानवीय क्षति नभएको र लहरीको अगाडिको भागमा मात्र क्षति पुगेको प्रहरीले जनाएको छ। लहरी घटनास्थलमै रहेको र सडकमा अवरोध नहुने गरी ट्राफिक व्यवस्थापन गरिएको छ।
दुर्घटना स्थल इप्रका रानीबाट करिब १.५ किलोमिटर उत्तर–पूर्वमा पर्ने प्रहरीले जनाएको छ।
यहाँ कमेन्ट गर्नुहोस्