०१ साउन २०८१, मंगलबार
Tags

पशु क्वारेन्टाइन कार्यालय रानीद्वारा अवैध पशुपन्छी तस्करी नियन्त्रणका लागि जनचेतना कार्यक्रम

रणभुमी डेस्क आइतबार, आषाढ १७, २०८१

विराटनगर / पशु क्वारेन्टाइन कार्यालय रानीले अवैध पशुपन्छी तस्करी नियन्त्रणका लागि एक जनचेतनामूलक कार्यक्रमको आयोजना गर्‍यो। कार्यक्रममा सीमावर्ती क्षेत्रका नागरिकहरूलाई अवैध गतिविधिबारे सूचना दिनका लागि प्रोत्साहित गर्न रिचार्ज कार्डहरू वितरण गरियो।

कार्यालय प्रमुख मुकेश मनी सिंहका अनुसार, कार्यक्रमको मुख्य उद्देश्य अवैध चोरी पैठारी नियन्त्रण गर्नु रहेको थियो। उनले भने, “हामी सर्वसाधारणलाई यस्ता गैरकानूनी गतिविधिहरू देखेमा सम्बन्धित निकाय वा नजिकैको सुरक्षाकर्मीलाई सूचना दिन प्रोत्साहित गर्दैछौं।”

कार्यक्रममा सशस्त्र प्रहरी बल नेपाल, स्थानीय प्रहरी, र विराटनगर महानगरपालिकाका प्रतिनिधिहरूको उपस्थिति रहेको थियो। सीमा सुरक्षा गुल्म रानीका प्रमुख देवराज विष्ट, इलाका प्रहरी कार्यालय रानीका प्रमुख प्रहरी निरीक्षक प्रकाश थापा, र विभिन्न बोर्डर आउट पोस्टका प्रमुखहरू पनि कार्यक्रममा सहभागी भएका थिए।

विराटनगर महानगरपालिकाको वडा नं. १५ र १६ का अध्यक्षहरू क्रमशः प्रकाश साह र उद्धव भुजेलले पनि कार्यक्रममा सहभागिता जनाए। उनीहरूले स्थानीय स्तरमा जनचेतना फैलाउन र समुदायको सहयोग जुटाउन महत्त्वपूर्ण भूमिका खेल्ने अपेक्षा गरिएको छ।

यस पहलले सीमा क्षेत्रमा हुने अवैध पशुपन्छी तस्करी नियन्त्रणमा सहयोग पुग्ने र समुदायको सहभागिता बढ्ने अपेक्षा गरिएको छ। साथै, यसले स्थानीय अर्थतन्त्र र पशु स्वास्थ्यमा सकारात्मक प्रभाव पार्ने आशा गरिएको छ।

यहाँ कमेन्ट गर्नुहोस्