पवन शाह मंगलबार, साउन २७, २०८२
काठमाडौँ — केन्द्रीय अनुसन्धान ब्यूरो (CIB) ले ‘Nepse AI’ नामक एप प्रयोग गरी सेयर बजारमा बढी नाफा कमाउने प्रलोभन देखाई सर्वसाधारणको बैंक खातामा रहेका रकम र व्यक्तिगत डेटा चोरी हुने घटनाबारे चेतावनी दिएको छ।
केन्द्रीय अनुसन्धान ब्यूरो (CIB) का अनुसार फेसबुक, इन्स्टाग्राम, टिकटक जस्ता सामाजिक सञ्जालमार्फत ‘Nepse AI’ नामको एपको विज्ञापन गरी सेयर बजारको विश्लेषण गर्ने र उच्च नाफा कमाउन सकिने भ्रामक सूचना प्रवाह गरिएको पाइएको छ।
उक्त एप डाउनलोड गर्न प्रलोभन दिइएपछि इन्स्टल गरेपछि रिमोट सेसन खोली पीडितको बैंक खातामा रहेको सम्पूर्ण रकम क्षणभरमै अन्यत्र ट्रान्सफर गर्ने र डिजिटल उपकरणमा रहेको सम्पूर्ण डेटा मेटाएर प्रमाण नष्ट गर्ने जस्ता आपराधिक गतिविधि भइरहेको सीआईबीले जनाएको छ।
यसबारे प्रहरीमा उजुरी समेत दर्ता भइसकेको छ। सीआईबीले ‘Nepse AI’ लगायत कुनै पनि अपरिचित लिंक वा एपहरूमा क्लिक नगर्न, डाउनलोड नगर्न र इन्स्टल नगर्न आग्रह गर्दै सर्वसाधारणलाई सजग रहन अनुरोध गरेको छ।
यहाँ कमेन्ट गर्नुहोस्