पवन शाह बुधबार, साउन २८, २०८२
विराटनगर / मोरङको विराटनगर महानगरपालिका–१३ मलाया रोडमा प्रहरीले १०८ ग्राम प्रतिबन्धित लागू औषध ब्राउन सुगरसहित दुई पुरुष र एक महिला गरी तीन भारतीय नागरिकलाई नियन्त्रणमा लिएको छ।
लागू औषध नियन्त्रण ब्युरो शाखा कार्यालय विराटनगर बाट खटेको टोलीले साउन २८ गते साँझ करिब ५:३० बजे संकास्पद गतिविधि देखिएपछि उनीहरूलाई रोकि तलासी लिँदा भारत, बिहार अररिया जिल्ला, जोगबनी निवासी ३९ वर्षीय अहमद अलीको साथबाट सेतो प्लास्टिकमा लुकाइएको खैरो हेरोइन फेला परेको थियो। बरामद सामानको तौल प्लास्टिकसहित ११७ ग्राम र प्लास्टिक बाहेक १०८ ग्राम रहेको जनाएको छ।
पक्राउ पर्ने अन्य व्यक्तिहरूमा ५१ वर्षीय मो. सराजुल र ३५ वर्षीया रुबी खातुन रहेका छन्। प्रारम्भिक सोधपुछमा ती तिनै जनाले भारतबाट ल्याई नेपालमा बिक्री गर्ने गरेको स्वीकार गरेको प्रहरीले जनाएको छ।
बरामद गरिएको हेरोइन र मोबाइल फोनसहित उनीहरूलाई थप अनुसन्धान तथा कानूनी कारबाहीका लागि इलाका प्रहरी कार्यालय रानी, मोरङमा बुझाइएको छ।
यहाँ कमेन्ट गर्नुहोस्