पवन शाह बिहिबार, साउन २९, २०८२
काठमाण्डौ / काठमाण्डौ उपत्यका अपराध अनुसन्धान कार्यालय टेकु प्रहरीले वैदेशिक रोजगार ठगीसम्बन्धी मुद्दामा फरार रहेका एन.ए.एन. मेरीटाइम ट्रेनिङ एण्ड एजेन्सी प्रालिका सञ्चालक त्रिलोक सिंहलाई पोखराबाट पक्राउ गरेको छ।
डम्बर देउवासहितको जाहेरीका आधारमा दायर वैदेशिक रोजगार ठगीसम्बन्धी मुद्दामा त्रिलोक सिंह लामो समयदेखि फरार थिए। उनी कास्कीको शिशुवा क्षेत्रमा लुकीछिपी बसिरहेको जानकारी पाएपछि इलाका प्रहरी कार्यालय शिशुवासँगको समन्वयमा प्रहरीले उनलाई २०८२ साउन २७ गते कास्कीको पोखरा महानगरपालिका–२७ डाँडाकोनाकबाट पक्राउ गरेको हो।
पक्राउ परेका सिंहको स्थायी ठेगाना बझाङको बुङ्गल नगरपालिका–६ भए पनि उनी हाल काठमाडौंको बूढानिलकण्ठ नगरपालिका–९ मा बस्दै आएका थिए। सिंहले ६६ जना पीडितबाट गरी कुल ४ करोड १७ लाख ९३ हजार २८० रुपैयाँ ठगी गरेको आरोप छ।
पक्राउपछि उनलाई थप अनुसन्धान र कारबाहीका लागि वैदेशिक रोजगार विभाग ताहाचल, काठमाडौं पठाइएको प्रहरीले जनाएको छ।
सूचना अधिकारी प्रहरी उपरीक्षक काजी कुमार आचार्यका अनुसार पक्राउ प्रक्रिया पूरा गरी मुद्दा सम्बन्धित निकायमा पठाइसकिएको छ।
यहाँ कमेन्ट गर्नुहोस्