पवन शाह मंगलबार, भाद्र ०२, २०८२
विराटनगर / चाडपर्व नजिकिँदै गर्दा नेपाल–भारतबीच बढ्दो यात्रु चापलाई मध्यनजर गर्दै विराटनगरस्थित रानी–जोगबनी नाकामा सुरक्षा निकायले विशेष छड्के चेकिङ्ग अभियान सञ्चालन गरेको छ।
कोशी प्रदेश प्रहरी कार्यालय विराटनगरअन्तर्गतको के–नाइन शाखा, विराटनगर विमानस्थलका प्रहरी सहायक निरीक्षक दिल बहादुर लिम्बुको नेतृत्वमा खटिएको टोलीले इलाका प्रहरी कार्यालय रानीका वरिष्ठ प्रहरी नायब निरीक्षक तिलक कार्की र ट्राफिक प्रहरीसँग समन्वयमा संयुक्त रूपमा चेकजाँच गरेको हो।
चेकिङ्गका क्रममा तालिमप्राप्त कुकुरहरू समेत परिचालन गरिएको थियो। ‘म्यागी’ नामक कुकुर विस्फोटक पदार्थ पत्ता लगाउन प्रयोग गरिएको छ भने ‘सागर’ नामक कुकुर लागुऔषध खोजतलासमा खटाइएको थियो।
प्रहरीका अनुसार बढ्दो यात्रु चापसँगै अवैध सामान, लागुऔषध तथा प्रतिबन्धित सामग्रीको आवत–जावत रोक्न यस किसिमको चेकजाँचलाई अझ कडाइ गरिएको हो।
ईलाका प्रहरी कार्यालय रानी का प्रहरी निरीक्षक कविन राईले बताए अनुसार, चाडपर्व अवधिभर सीमावर्ती नाकामा सुरक्षा कडाइ गर्ने योजना छ र आवश्यकताअनुसार थप सुरक्षाकर्मी तथा तालिमप्राप्त डग परिचालन गरिनेछ।
यहाँ कमेन्ट गर्नुहोस्