रणभूमी सम्वाददाता मंगलबार, भाद्र ०२, २०८२
संखुवासभा / कोशी प्रदेश प्रहरी प्रमुख प्रहरी नायव महानिरीक्षक (डीआईजी) ईश्वर कार्कीले संखुवासभा जिल्लामा प्रहरी सेवाको प्रभावकारिता बढाउन विशेष निर्देशन दिनुभएको छ। उहाँले आइतबार जिल्ला प्रहरी कार्यालय संखुवासभाको निरीक्षण भ्रमण गर्दै कार्यालय भवन, विभिन्न शाखा तथा हिरासत कक्षको अवस्थाबारे जानकारी लिनुभएको थियो।
निरीक्षणका क्रममा डीआईजी कार्कीले प्रहरी सेवामा नागरिकको सहज पहुँच कायम राख्दै शान्ति सुरक्षा तथा सार्वजनिक सम्पत्तिको सुरक्षालाई पहिलो प्राथमिकतामा राख्न निर्देशन दिनुभयो। विशेषगरी भौगोलिक रूपमा कठिन र यातायात पहुँच कम भएका संखुवासभाका दुर्गम क्षेत्रमा नियमित लामो तथा छोटो दुरीका गस्ती परिचालन गर्नुपर्नेमा उहाँले जोड दिनुभयो।
उहाँले अपराध नियन्त्रणमा प्रहरीको सक्रियता बढाउन सचेतनामूलक कार्यक्रम सञ्चालन गर्न सुझाव दिँदै, “दुरदराजका नागरिकले पनि प्रहरी सेवा नजिकै पाउने अनुभूति गर्नुपर्छ,” भन्नुभयो।
त्यस्तै असहाय, पीडित तथा ज्येष्ठ नागरिकलाई प्राथमिकताका साथ सेवा दिनुपर्ने भन्दै उहाँले प्रहरी संगठनप्रति जनविश्वास कायम राख्न इमान्दारीपूर्वक दायित्व निर्वाह गर्न सम्पूर्ण प्रहरी कर्मचारीलाई निर्देशन दिनुभयो। अपराध हुन नदिने वातावरण बनाउनु र भएका अपराधको छिटो र प्रभावकारी अनुसन्धान गर्नु प्रहरीको प्रमुख दायित्व भएको भन्दै उहाँले संगठनको छवि सधैं उच्च राख्न आग्रह गर्नुभयो।
संखुवासभा जिल्लामा प्रहरीले लामो समयदेखि चुनौतीपूर्ण भौगोलिक अवस्थासँग जुध्दै सुरक्षा सेवा दिँदै आएको छ। डीआईजी कार्कीको यस निर्देशनले प्रहरी सेवाको पहुँच र प्रभावकारितामा अझ सकारात्मक प्रभाव पर्ने विश्वास गरिएको छ।
यहाँ कमेन्ट गर्नुहोस्