पवन शाह बिहिबार, भाद्र ०४, २०८२
सुनसरी / सुनसरीको इटहरी उपमहानगरपालिका–१८ बालग्रामस्थित घरभाडामा बस्दै आएका एक व्यक्ति प्रतिबन्धित लागू औषध खैरो हेरोईनसहित पक्राउ परेका छन्।
लागू औषध नियन्त्रण ब्युरो शाखा कार्यालय विराटनगरबाट खटिएको टोलीले सप्तरी, रामपुर मल्हनिया गाउँपालिका–३ का ३७ वर्षीय सत्यनारायण यादवलाई बुधबार साँझ ५ः३० बजेतिर नियन्त्रणमा लिएको हो।
यादव बस्दै आएको गणेश प्रसाद ढकालको घरमा गरिएको छापामारीका क्रममा उनले लगाएको सेतो हाफपाइन्टको गोजीभित्र लुकाइराखेको सेतो प्लास्टिकको पोकाबाट १२० ग्राम ९० मिलिग्राम खैरो हेरोईन फेला परेको प्रहरीले जनाएको छ। प्लास्टिकसहित बरामद तौल १२४ ग्राम ९५० मिलिग्राम पुगेको थियो।
त्यसैगरी उनको कोठाबाट प्रयोग भएको मोबाइल फोन १ थान र डिजिटल तराजु १ थान पनि फेला पारिएको छ। प्रारम्भिक सोधपुछमा यादवले लागू औषध बिक्री गर्दै आएको स्वीकार गरेको प्रहरीले जनाएको छ।
पक्राउ परेका यादवलाई बरामद सामग्रीसहित आवश्यक कारबाहीका लागि ईलाका प्रहरी कार्यालय पकली, सुनसरीमा बुझाइएको लागू औषध नियन्त्रण ब्युरो शाखा कार्यालय विराटनगरले जानकारी दिएको छ।
यहाँ कमेन्ट गर्नुहोस्