रणभूमी सम्वाददाता आइतबार, भाद्र ०७, २०८२
विराटनगर / मोरङको विराटनगर महानगरपालिका–१५ मण्ठापोखरीबाट ठूलो परिमाणको प्रतिबन्धित लागुऔषध खैरो हेरोईनसहित २ भारतीय नागरिकलाई प्रहरीले पक्राउ गरेको छ।
आज साँझ ४:३० बजेतिर विशेष सूचनाको आधारमा निगरानी गर्दै जाँदा संकास्पद अवस्थामा दुई जना व्यक्तिलाई पक्राउ गरी चेकजाँच गर्दा मो. सद्दाम हुसेन (३० वर्ष), भारत बिहार राज्य, कटिहार जिल्ला, शिवानानपुर–४ निवासीले बोकेको नीलो ब्यागभित्र लुकाइ राखिएको हरियो बक्स पाइन्टको गोजीबाट हेरोईन फेला परेको प्रहरीले जनाएको छ। बरामद हेरोईनको तौल प्लास्टिकसहित १५५ ग्राम र प्लास्टिक बाहेक १४७ ग्राम रहेको बताइएको छ।
यस क्रममा भारतकै खरसोता–५ निवासी बमकिम कर्माकर (३२ वर्ष) समेत पक्राउ परेका छन्। उनीहरूबाट दुई थान मोबाइल फोन समेत बरामद गरिएको छ।
प्रारम्भिक सोधपुछका क्रममा दुवैले उक्त हेरोईन नेपालमै बिक्री गर्ने गरेको स्वीकार गरेको प्रहरीको भनाइ छ। बरामद लागुऔषध र मोबाइलसहित उनीहरूलाई आवश्यक अनुसन्धान तथा कारबाहीका लागि इलाका प्रहरी कार्यालय रानीमा बुझाइएको छ।
यहाँ कमेन्ट गर्नुहोस्