रणभूमी सम्वाददाता आइतबार, भाद्र ०७, २०८२
काठमाडौं / नेपाल प्रहरीले २०८१/८२ आर्थिक वर्षको कार्यसम्पादन समीक्षा तथा २०८२/८३ को कार्यसम्पादन सम्झौता आइतबार सम्पन्न गरेको छ । नेपाल प्रहरी प्रधान कार्यालयमा आयोजित कार्यक्रममा प्रहरी महानिरीक्षक (आईजीपी) दिपक थापाको उपस्थितिमा वार्षिक प्रगति समीक्षा तथा नयाँ आर्थिक वर्षको कार्यसम्पादन सम्झौता हस्ताक्षर गरिएको हो ।
समारोहमा प्रहरी महानिरीक्षक थापाले विभागीय प्रमुखहरू, काठमाडौं उपत्यका प्रहरी कार्यालयका प्रमुख तथा सातै प्रदेश प्रहरी कार्यालयका प्रमुख एवम् प्रतिनिधिसँग कार्यसम्पादन सम्झौतामा हस्ताक्षर गर्नुभयो । यस क्रममा राष्ट्रिय प्रहरी प्रशिक्षण प्रतिष्ठान, प्रशासन, मानवस्रोत विकास, अपराध अनुसन्धान, कार्य विभाग, नेपाल प्रहरी अस्पताल र केन्द्रीय अनुसन्धान ब्यूरो (CIB) लगायतका विभागीय प्रमुखहरूसँग पनि सम्झौता सम्पन्न भएको छ ।
यस्तै, प्रदेश प्रहरी कार्यालयका प्रमुख तथा प्रतिनिधिहरूसँग भर्चुअल माध्यमबाट सम्झौता हस्ताक्षर गरिएको थियो ।
कार्यक्रमलाई सम्बोधन गर्दै आईजीपी थापाले नेपाल प्रहरी कार्ययोजना–२०८० लाई संगठनको आन्तरिक सुदृढिकरणको आधार मान्दै यसमा समावेश लक्ष्यहरू पूरा गर्न सुरुदेखि नै प्रतिबद्ध भएर लाग्नुपर्ने आवश्यकता औंल्याउनुभयो । उहाँले अघिल्लो आर्थिक वर्षको समीक्षा गर्दा प्रगति सन्तोषजनक रहे पनि अझै गुणस्तरीय सेवा प्रवाह, संगठनको दीर्घकालीन रूपान्तरण र कार्यक्षमता वृद्धि गर्नेतर्फ ध्यान दिनुपर्ने बताउनुभयो ।
“प्रहरी सेवा चुस्त-दुरुस्त र प्रभावकारी बनाउन कार्यसम्पादन सम्झौताले महत्वपूर्ण योगदान पुर्याउनेछ,” आईजीपी थापाको भनाइ छ ।
यस अवसरमा प्रहरी नायव महानिरीक्षक दिपक रेग्मीले २०८१/८२ कार्यसम्पादन सम्झौताका उपलब्धि र प्रगति सम्बन्धी प्रस्तुतीकरण गर्नुभयो ।
कार्यक्रममा प्रहरी अतिरिक्त महानिरीक्षकहरू, प्रहरी नायव महानिरीक्षकहरू, वरिष्ठ प्रहरी अधिकृतहरू, सातै प्रदेश प्रहरी प्रमुख तथा प्रतिनिधिहरू, प्रदेश प्रहरी तालिम केन्द्रका प्रमुख, विशेष सुरक्षा गण, ट्राफिक व्यवस्थापन कार्यालय र जिल्ला प्रहरी कार्यालयका प्रमुखहरूको समेत प्रत्यक्ष तथा भर्चुअल उपस्थिती रहेको थियो ।
यहाँ कमेन्ट गर्नुहोस्