रणभूमी सम्वाददाता बुधबार, भाद्र १०, २०८२
विराटनगर / विराटनगर महानगरपालिका–१५ स्थित ऐतिहासिक बरको रुखमुनी यसवर्ष पनि परम्परागत रूपमा तीज विशेष सांस्कृतिक कार्यक्रम सम्पन्न भएको छ। “हडताली हाट” परिसरमा आयोजित कार्यक्रममा ब्रतालु महिलाहरूको बाक्लो उपस्थिति रहेको थियो।
कार्यक्रममा प्रमुख अतिथि विराटनगर महानगरपालिकाकी उपमेयर शिल्पा निराला कार्की रहनुभयो। कार्यक्रमको आयोजना कविता दाहाल, बबिता दाहाल र रोशन शाही ठकुरीले संयुक्त रूपमा गर्नुभएको हो।
तीजको अवसरमा उपवास बसेका महिलाहरू, किशोरी र बालिकाले सांस्कृतिक नृत्य प्रस्तुति दिएका थिए। साथै कार्यक्रममा स्थानीय सामाजिक अभियन्ताहरुलाई अतिथि रूपमा स्वागत गरिएको थियो भने जेष्ठ नागरिकहरुलाई सम्मान समेत गरिएको थियो।
आयोजकका अनुसार कार्यक्रममा एक हजारभन्दा बढी दर्शकको उपस्थिति रहेको थियो। उपमेयर कार्कीले तीजलाई धार्मिक आस्था मात्र नभई महिला एकता र सांस्कृतिक संरक्षणसँग जोडिएको पर्वका रूपमा मनाउनुपर्ने उल्लेख गर्नुभयो।
आयोजक बबिता दाहालका अनुसार परम्परागत रूपमा हरेक वर्ष यस स्थानमा नियमित रुपमा तीज कार्यक्रम आयोजना हुँदै आएको छ।
यहाँ कमेन्ट गर्नुहोस्