पवन शाह बिहिबार, भाद्र ११, २०८२
विराटनगर / विराटनगर–१५ रामजानकी चौक रानीमा हरेक वर्ष झैँ यस वर्ष पनि श्री श्री १०८ श्री गणेश पूजा समारोह भव्यताका साथ सम्पन्न भएको छ। गणेश चतुर्थीको दिनदेखि सुरु भएको यो धार्मिक महोत्सव लगातार चार दिनसम्म चलेको थियो।
समारोहमा नेपाल र भारत दुवै देशबाट करिब २० हजारभन्दा बढी श्रद्धालु भक्तजनहरूले सहभागिता जनाएका थिए। पहिलो दिन मूर्ति स्थापना र विशेष पूजा–पाठ सम्पन्न गरिएपछि दोस्रो दिन भक्तजनहरूको पूजा–अर्चना साथै विभिन्न धार्मिक तथा सांस्कृतिक कार्यक्रम सहित भव्य झाखिको आयोजना गरियो।
तेस्रो दिन बिहीवारको कार्यक्रमलाई नेपाल तथा भारतका प्रख्यात भजन गायक मण्डलीले प्रस्तुत गरेका धार्मिक भजनले अझ आकर्षक बनाएको थियो। भजन कार्यक्रममा भक्तजनहरूको उल्लेख्य भीड देखिएको आयोजक समितिले जनाएको छ।
यस वर्षको पूजामा विराटनगर–१५ कै एक स्थानीय झाँकीलाई प्राथमिकतामा राखी विशेष प्रस्तुत गरिएको थियो। कार्यक्रमलाई सफल बनाउन स्थानीय समाजसेवी तथा अभियन्ताहरूले सक्रिय योगदान पुर्याएका थिए।
आयोजक समितिका तर्फबाट राजन झााले सम्पूर्ण सहयोगी र सहभागीलाई धन्यवाद ज्ञापन गर्दै यस्तो धार्मिक तथा सांस्कृतिक कार्यक्रमले नेपाल–भारतबीचको धार्मिक एकता र सामाजिक सौहार्दलाई अझ प्रगाढ बनाउन सहयोग गर्ने विश्वास व्यक्त गरे।
यहाँ कमेन्ट गर्नुहोस्