पवन शाह शुक्रबार, भाद्र १२, २०८२
विराटनगर / विराटनगर–१५ रानीस्थित रामजानकी मन्दिर परिसरमा यस वर्ष पनि श्री श्री १०८ श्री गणेश पूजा समारोह भव्यताका साथ सम्पन्न भएको छ। चार दिनसम्म चलेको यस धार्मिक कार्यक्रममा नेपाल र भारत गरी करिब २० हजारभन्दा बढी श्रद्धालु भक्तजनले धार्मिक लाभ लिएका थिए।
समारोहको विशेष आकर्षण भने चर्चित क्रिकेटर ललित राजवंशीको उपस्थिति रह्यो। आयोजक समितिले उनलाई मन्दिर परिसरमै स्वागत तथा सम्मान गरेको थियो। राजवंशीलाई देख्न तथा नजिकै भेट्न पाउँदा उपस्थित भक्तजन उत्साहित बनेका थिए। कार्यक्रम स्थलमा उनीसँग सेल्फी खिच्नेहरुको घुइँचो लागेको थियो।
पहिलो दिन मूर्ति स्थापनासँगै प्रारम्भ भएको यस समारोहमा भजन, कीर्तन, सांस्कृतिक प्रस्तुति र विभिन्न धार्मिक अनुष्ठान गरिएका थिए।
समारोहका प्रमुख अर्चक तथा समिति सदस्यहरुले नेपाल–भारत सीमावर्ती क्षेत्रको धार्मिक सद्भाव र संस्कृतिको संरक्षणमा यस्ता कार्यक्रम महत्त्वपूर्ण हुने बताएका छन्।
यहाँ कमेन्ट गर्नुहोस्