पवन शाह आइतबार, भाद्र १४, २०८२
विराटनगर / प्रसूति तथा स्त्रीरोग विशेषज्ञ डा. बालकृष्ण साहको गैरआख्यान कृति ‘गर्भको गर्व’ विषयमा विराटनगरमा संवाद कार्यक्रम सम्पन्न भएको छ। हाम्रोमत दैनिकको आयोजनामा शनिबार भएको कार्यक्रममा पुस्तकका विविध पक्षबारे विस्तृत छलफल भएको हो।
कार्यक्रमका प्रमुख अतिथि पूर्वाञ्चल विश्वविद्यालयका उपकुलपति प्रा.डा. बिजु कुमार थपलियाले ‘गर्भको गर्व’ लाई अत्यन्तै पठनीय र महत्त्वपूर्ण कृति भने। उनले लेखक साहले आफ्नो पेशागत यात्रामा देखेका यथार्थ घटनाहरूलाई जीवन्त ढंगले प्रस्तुत गरेको उल्लेख गर्दै पुस्तकमा आम पाठकका लागि गहिरो सन्देश निहित रहेको बताए। “मेरो आमा पनि यो पुस्तक पढिरहेकी छिन्, यसले आमाबाबु दुवै पुस्तामा चेतना जगाउने क्षमता राख्छ,” उपकुलपति थपलियाले भने।
पुस्तकमाथि टिप्पणी गर्दै साहित्यकार हरि बराल, हरि कट्टेल र दिनेश श्रेष्ठले यसमा समेटिएका पात्र र प्रसंगहरू वास्तविक घटनामा आधारित रहेको जानकारी दिए। उनका अनुसार पुस्तकले महिला स्वास्थ्य, उमेरअघिको विवाह, जन्मान्तरको समस्या, छोराको चाहना, र गर्भावस्थामा महिलाले भोग्नुपर्ने जोखिमलाई सशक्त ढंगले उजागर गरेको छ। प्रत्येक कथाको अन्त्यमा सम्बन्धित रोग र स्वास्थ्यबारे दिइएको जानकारीलाई उनीहरूले विशेष रूपमा सराहना गरे।
साहित्यकार तथा पत्रकार मिनकुमार नवदीत, दिनेश सुवेदी र प्रतिमा निरौलाले पनि शुभकामना मन्तव्य दिँदै पुस्तक समाजमा चेतना फैलाउने माध्यम बन्ने विश्वास व्यक्त गरे।
लेखक डा. साहले आफूले पेसागत जीवनमा देखेका वास्तविक घटनालाई साहित्यमा उतार्ने प्रयास गरेको बताए। उनले पाठक र शुभेच्छुकहरूको निरन्तर साथ पाएमा भविष्यमा पनि यस्ता कृतिहरू ल्याउने प्रतिबद्धता व्यक्त गरे। सो अवसरमा हाम्रमत दैनिकले डा. साहलाई सम्मानसमेत गरेको थियो।
कार्यक्रमको अध्यक्षता हाम्रोमत दैनिकका सम्पादक अर्जुन आचार्यले गरेका थिए। समापन मन्तव्यमा उनले ‘गर्भको गर्व’ ले नेपाली समाजमा गर्भावस्था र महिला स्वास्थ्यबारे गम्भीर बहस सुरु गर्ने अपेक्षा व्यक्त गर्दै आगामी दिनमा पनि साहित्यलाई प्राथमिकतामा राख्ने घोषणा गरे।
साहित्यपोस्टद्वारा प्रकाशित ‘गर्भको गर्व’ मा ‘छोरी किन भएछु’, ‘चेलीका पीडा’, ‘प्रीतिको जित’, ‘रगतको जात’, ‘छोरीको माइती’, ‘त्यो लडाइँ’ लगायत ९ वटा मार्मिक कथा समेटिएका छन्। यी कथाहरू गर्भावस्थामा महिलाले भोग्ने जटिलता र सामाजिक मानसिकतालाई गहिरो ढंगले प्रस्तुत गर्छन्।
डा. साहको यो दोस्रो कृति हो। यसअघि उनले सुरक्षित मातृत्वसम्बन्धी ‘आमा’ शीर्षकमा पुस्तक प्रकाशित गरेका थिए।
यहाँ कमेन्ट गर्नुहोस्