१५ भाद्र २०८२, सोमबार
Tags

भारतमा अवैध किड्नी (मृगौला) कारोबार गर्ने गिरोह भण्डाफोर, दुई जना पक्राउ

पवन शाह आइतबार, भाद्र १४, २०८२

जीवन बदल्छ भनेर भारतसम्म लगाइए, तर बेहोस बनाएर मृगौला खोसियो; निर्दोष नेपालीलाई शिकार बनाउने गिरोहको नाइके अखेर पक्राउ”

काठमाडौं / नेपाल प्रहरीले नेपालका विभिन्न जिल्लाबाट मानिसलाई प्रलोभनमा पारी भारतको नयाँ दिल्लीमा अवैध रूपमा मृगौला (किड्नी) निकाल्ने गिरोह भण्डाफोर गरेको छ। प्रहरीले सिन्धुपाल्चोकका ३८ वर्षीय श्याम कृष्ण भण्डारी र २९ वर्षीय सुजन भारतीलाई सीमा नाकाबाट पक्राउ गरेको हो।

मानव बेचबिखन अनुसन्धान ब्यूरोका अनुसार भण्डारी समूहले गरीब र असहायलाई “मृगौला दिए मर्दैन, स्वास्थ्यमा असर गर्दैन, १६ लाख पाउँछ” भन्दै भारत पुर्‍याउने र दिल्लीका अस्पताल तथा क्लिनिकसँग मिलेर अवैध रूपमा मृगौला निकाल्ने गरेको खुलेको छ। तर पीडितले भने सो रकम समेत नपाएको बताएका छन्।

‘Operation Life Shield’ नामक विशेष कारबाहीमा यसअघि नै तीन जना पक्राउ परिसकेका थिए। भण्डारीले २५ जनाको मृगौला अवैध रूपमा निकालिएको बयान दिएका छन् भने प्रहरीलाई सयभन्दा बढी व्यक्तिको मृगौला बेचबिखनमा संलग्न भएको शंका छ।

मानव बेचबिखन तथा ओसारपसार (नियन्त्रण) ऐन, २०६४ अनुसार यस्तो अपराधमा १० वर्ष कैद र २ देखि ५ लाख रुपैयाँसम्म जरिवाना हुने व्यवस्था छ। अहिले घटना सम्बन्धी थप अनुसन्धान भइरहेको प्रहरीले जनाएको छ।

यहाँ कमेन्ट गर्नुहोस्