रणभूमी सम्वाददाता आइतबार, आश्विन १२, २०८२
विराटनगर / कोशी प्रदेश प्रहरी कार्यालय विराटनगरले मोरङको इलाका प्रहरी कार्यालय रानीमा कार्यरत प्रहरी निरीक्षक कविन राईलाई भदौ महिनाको “सर्वोत्कृष्ट प्रहरी” घोषित गरेको छ।
प्रहरी निरीक्षक राईले विभागीय मूल्य-मान्यता र आदेश-निर्देशनको पालना गर्दै उच्च मनोबल र साहसका साथ आफ्नो पदीय कर्तव्य निर्वाह गरेका छन्। उनको नेतृत्वमा रहेको प्रहरी चेकिङ टोलीले भदौ २८ गते विराटनगर महानगरपालिका-१५ स्थितबाट बन्दाकोपी बोकेको मे.१ च ५८२६ नम्बरको बोलेरो गाडीमा लुकाई छिपाई राखेको २६२ किलो ५८० ग्राम गाँजा बरामद गरी ३ जना संलग्न व्यक्तिहरूलाई नियन्त्रणमा लिएको थियो।
यसैगरी उनको टोलीले विराटनगर महानगरपालिकाका विभिन्न स्थानहरूबाट चोरी भएका ११ थान ल्यापटप, १ थान मोटरसाइकल, ३ थान अटो टेम्पो, १ थान सिटी रिक्सा, ४ थान स्कुटर, १४ थान १२ भोल्टका ब्याट्री, ३ थान इन्भर्टर, ४ थान सोफा, २ थान फ्रिज, १ थान एसी, १ थान इलेक्ट्रिकल ओभन, २ थान स्ट्यान्ड फ्यान र १ थान इन्डक्सन चुलो फेला पारी सम्बन्धित धनीहरूलाई बुझाएको थियो।
त्यसैगरी विराटनगर महानगरपालिका-१३ र १५ स्थितबाट लागू औषध नियन्त्रण ब्यूरोसँगको समन्वयमा ३३७ ग्राम लागू औषध ब्राउनसुगर सहित कारोबारमा संलग्न ३ जनालाई नियन्त्रणमा लिन सफल भएको थियो।
प्रहरी निरीक्षक राईबाट सम्पादित यी उत्कृष्ट कार्यहरूको उच्च मूल्याङ्कन गर्दै कोशी प्रदेश प्रहरी कार्यालयले उनलाई २०८२ साल भदौ “महिनाको सर्वोत्कृष्ट प्रहरी” घोषित गरेको हो।
यहाँ कमेन्ट गर्नुहोस्