पवन शाह शुक्रबार, साउन ३०, २०८२
दार्चुला / दार्चुलामा चितुवाको जस्तो देखिने छाला सहित एक व्यक्ति पक्राउ परेका छन्। जिल्ला बैतडीको पुर्चौडी नगरपालिका–७ ऐर गाउँका ५० वर्षीय भान सिंह ऐरलाई शैल्यशिखर नगरपालिका–३ कर्कलेस्थित गोकुलेश्वर–मार्मा सडक खण्डको छेउमा संकास्पद अवस्थामा प्रहरीले नियन्त्रणमा लिएको हो।
जिल्ला प्रहरी कार्यालय दार्चुला र इलाका प्रहरी कार्यालय गोकुलेश्वरबाट खटिएको संयुक्त टोलीले ऐरको साथमा रहेको कालो झोला चेकजाँच गर्दा ६ फिट ३ इन्च लम्बाइ (शिरदेखि पुच्छरसम्म), अगाडिको खुट्टा भागको चौडाइ ३ फिट १० इन्च, पछाडिको खुट्टा भागको चौडाइ ३ फिट ८ इन्च र कम्मरको भागको चौडाइ १ फिट १० इन्च भएको चितुवाको जस्तो देखिने छाला बरामद भएको प्रहरीले जनाएको छ।
बरामद गरिएको छाला तथा पक्राउ परेका व्यक्तिलाई आवश्यक कारवाहीका लागि डिभिजन वन कार्यालय दार्चुला पठाइएको प्रहरीले जनाएको छ।
यहाँ कमेन्ट गर्नुहोस्