पवन शाह शनिबार, भाद्र १३, २०८२
विराटनगरमा आयोजित “मधेसी राजनीति : दशा एवं दिशा” विचार गोष्ठीमा सहभागी नेताहरू र बुद्धिजीवीहरूले मधेसी समुदायले राज्यका सबै तहमा बराबरी अधिकार प्राप्त गर्न एकताबद्ध हुनु जरुरी भएको धारणा राख्दै संगठित आन्दोलनको आवश्यकता औंल्याएका छन्।
विराटनगर / मधेसी उत्थान विचार मञ्च, विराटनगर–मोरङले शनिबार आयोजना गरेको “मधेसी राजनीति : दशा एवं दिशा” विषयक विचार गोष्ठीमा वक्ताहरूले मधेसी समुदायले बराबर अधिकार प्राप्त गर्न एकताबद्ध हुनुको विकल्प नभएको बताएका छन्।
मञ्चका संयोजक युवा राजनीतिज्ञ उमेश यादवले विराटनगरमा ६३ देखि ६५ प्रतिशतसम्म मधेसी जनसंख्या रहे पनि संघ, प्रदेश र स्थानीय सरकारका निकायमा सहभागिता न्यून रहेको प्रतिवेदन प्रस्तुत गरे। उनले बराबरीको अधिकार प्राप्त गर्न मधेसी एकता आवश्यक भएको भन्दै सबैलाई अभियानमा सहभागी हुन आह्वान गरे।
कार्यक्रममा नेपाली कांग्रेस कोशी प्रदेशका कोषाध्यक्ष राजेश गुप्ता, युवा नेता रञ्जित झा, सलिम अंसारी, मो. फैयाज, विराटनगर–९ का वडाध्यक्ष विश्वनाथ भगत (लालु) र विराटनगर–१५ का वडाध्यक्ष प्रकाश साह सहभागी थिए। त्यस्तै नेकपा एमालेका युवा नेता मृत्युन्जय झा, जसपा नेपालका केन्द्रीय सदस्य जोगिलाल यादव, रामविलास यादव र नेकपा (एकीकृत समाजवादी) का केन्द्रीय सदस्य ओसिम आलमले आ–आफ्नो धारणा राखे। आलमले मधेसी भोट सधैं इमान्दार रहे पनि मधेसी नेताहरूले नै त्यसको अपमान गरेको आरोप लगाए।
मधेसी बुद्धिजीवी रामरिझन यादव, डा. महादेव भगत, जफर जमाली, साहेब अहमद गुड्डु, मो. कादिर र रामप्रसाद साहलगायतले मधेस आन्दोलन (२०६२/०६३) लाई स्मरण गर्दै फेरि अर्को आन्दोलन आवश्यक भएको धारणा व्यक्त गरे।
कार्यक्रममा मोरङ उद्योग व्यापार संघका पूर्व अध्यक्ष तथा नेपाल उद्योग परिसंघ कोशी प्रदेशका वरिष्ठ उपाध्यक्ष प्रकाश मुन्दडा, उद्योग संगठन मोरङका अध्यक्ष नन्दकिशोर राठी र मोरङ उद्योग व्यापार संघका वरिष्ठ उपाध्यक्ष अनिल साह पनि सहभागी थिए। अनिल साहले मधेसी अधिकार सुनिश्चित गर्न उद्योग व्यवसायिक क्षेत्रले समेत भूमिका खेल्ने बताएका थिए।
३ सयभन्दा बढी मधेसी समुदायका अगुवाहरूको सहभागिता रहेको कार्यक्रममा मैथिली अभियानका अभियन्ता तथा मञ्चका संस्थापक प्रविण नारायण चौधरीले सञ्चालन गरेका थिए।
यहाँ कमेन्ट गर्नुहोस्