पवन शाह शनिबार, साउन ३१, २०८२
विराटनगर / विराटनगर महानगरपालिकाले बरगाछीदेखि रोडशेषसम्मको डिभाइडरमा रोपिएका फूल र विरुवाको संरक्षणका लागि ४ सय स्वयम्सेवक परिचालन गर्ने भएको छ। राधाकृष्ण रथयात्राका क्रममा भीडभाडका कारण विरुवा नष्ट हुने सम्भावना देखिएपछि महानगरले यो कदम चालेको हो।
महानगरको सभाहलमा शनिबार आयोजित प्रशिक्षण कार्यक्रममा मेयर नागेश कोइरालाले स्वयम्सेवकलाई अनुशासित रहँदै जिम्मेवारी पूरा गर्न आग्रह गरे। उनले फूल र विरुवाको संरक्षणसँगै महिला, बालबालिका र ज्येष्ठ नागरिकमाथि अभद्र व्यवहार हुने अवस्थालाई नियन्त्रणमा लिएर तत्काल प्रहरीलाई जिम्मा दिन निर्देशन दिए। “तपाईंहरूले कसैलाई कुटपिट वा हुलहुज्जत नगरी शान्तिपूर्ण तरिकाले आफ्नो काम गर्नुहोला,” मेयर कोइरालाले भने।
प्रशिक्षण कार्यक्रममा प्रमुख प्रशासकीय अधिकृत रामप्रसाद ढुंगेल, रथयात्रा आयोजक समितिका अध्यक्ष कैलाश रेग्मी, सचिव कृष्ण कार्की, तथा नगर प्रहरी प्रमुख डिएसपी अनमोल खड्काले रथयात्रालाई मर्यादित र व्यवस्थित बनाउन सबै पक्षले सहयोग गर्नुपर्नेमा जोड दिए।
महानगर प्रहरी निरीक्षक राजन पौडेलका अनुसार फूल र विरुवाको संरक्षणका लागि करिब ४ सय स्वयम्सेवक खटाइने छन्।
यहाँ कमेन्ट गर्नुहोस्